Шашылыш кабар:

Абактагы ачкачылык, түрмөдөгүлөрдүн талабы

Абактагы ачкачылык, түрмөдөгүлөрдүн талабы
Коом
0

Чүй облусуна караштуу Молдовановка айылындагы №27 түзөтүү колониясындагылар ачкачылык кармоону дагы деле улантышууда. Жазаларды аткаруу мамлекеттик кызматынан кабарлашкандай тамак-аштан баш тарткандардын саны 50 кишиден ашат.

Соңку маалымат боюнча учурда абактагы 54 адам ачкачылыкты улантып жатат. Алардын 10у колун кесип, 9у оозун тигип алган. 5-июнда алгач 10 адам ачкачылык жарыялап, кийин алардын саны 60ка жеткен. Андан соң 5 адам ачкачылыктан баш тарткан. Абактагылардын абалы менен Кыйноолордун алдын алуу боюнча улуттук борбордун кызматкерлери таанышып, алардын талаптарын угуп келген. Соттолгондордун талабы тууралуу аталган борбордун жетекчиси Нурдин Сулайманов «Марал» радиосуна буларды билдирди.

— «Уюлдук телефон бергиле, камерада столдор жерге бекитилген, аларды ары-бери жылгыдай кылгыла» деп жатышат. «Тамактары жакпайт. Халал эмес. Электроплита коюп бергиле, тамакты өзүбүз жасап ичебиз» дешет.   

Өткөн апта аягында Акыйкатчы институту №27 түзөтүү колониясында 60 адам расмий ал эми 9 адам билдирүүсүз эле ачкачылык жарыялаганын, 11 адам колун кесип, 10 адам оозун тигип алганын билдирген. Ачкачылык жарыялагандар Акыйкатчы институтуна камакта кармоонун режимин өзгөртүү, соттолгондордун камерасын текшерүүнү азайтуу, уюлдук телефон көтөрүүгө уруксат берүү сындуу талаптары бар экенин айтышкан. Жазаларды аткаруу кызматынын төрагасы Таалайбек Жапаров абакта укук бузуу болбогонун белгилеп, коюлган талаптарды «мыйзамсыз» деп атады.

— Азыр орозо учуру, кээ бирлери орозо кармап жатат. Талаптары болсо мыйзамга ылайык келбейт. Абакты прокуратура келип текшерди. Кыйноолордун алдын алуу боюнча улуттук борбордун кызматкерлери, Акыйкатчынын өкүлдөрү келип кетти. ЖАМКнын Коомдук кеңеши карап жатат. Баары тең эле мыйзамга ылайык экен дешүүдө. Азыр кээ бири тамак ала баштады.  

Молдовановкадагы түрмөдөгүлөрдүн ачкачылык жарыялаганына бир жума болуп калды. Тамак-аштан баш тарткандардын баары тең экстремизм жана терроризмге айыпталып соттолгондор. №27 түзөтүү колониясында бул беренелер менен кесилип, жаза мөөнөтүн өтөп жаткандардын саны 89га жетет. Абактагы кыйноолор жана андагы шарттарды иликтеп келген «Кылым шамы» уюмунун жетекчиси, укук коргоочу Азиза Абдирасулова №27 түзөтүү колония экенин жана анда кармоо шарты тууралуу төмөнкүлөргө токтолду.

— №27 бул колония. Ал жерде камералык тип эмес. Андыктан абактагыларды камап койбош керек. Күнүгө сыртка чыгып туруш керек. Колонияга баргандан кийин ал колониядай болушу шарт. Аларга жумуш берсе дагы болмок. Бирок аны менен камсыздалган эмес. Анан отура берип тажашат. Бирок баардыгы тең тартип, режим менен болушу керек.   

Аталган түзөтүү колониясы 2016-жылы оңдоп-түзөөдөн өткөрүлгөн. Ошондой эле ага өзгөчө режимдеги абак статусу берилери айтылган. Учурда ал түрмөдө канча киши кармалып турганы ачыкталган жок. Ал эми Жазаларды аткаруу кызматынын басма сөз катчысы Элеонора Сабатарованын айтымында, ачкачылык жарыялагандар былтыр дагы ушундай кадамга барышкан. Жаңы мыйзамдын талабына ылайык алар камерада кармалышы керек.

— Ушул эле кылмышкерлер былтыр дагы орозо маалында ушундай эле жети күн ачкачылык жарыялашкан. Мыйзамга өзгөртүү кирип биз буларды камера тибиндеги мекемеге жайгаштырганыбызга эки жыл болду. «Режимди жөнөкөйлөтүп бергиле» деген талаптарынын бир себеби ушул болуп жатат. Анткени булар мурда лагер тибиндеги абакта кармалып турушкан. Мыйзамга өзгөрүү киргендиктен эми биз аларды камерада кармоого мажбурбуз.

Айрым ММКлар жеке булактарына таянып, түрмөдөгүлөргө көзөмөл кылгысы келген соттолуучулардын бири күчүн ушундай жол менен көрсөткүсү келип жатканын жазышты. Мурдагы акыйкатчы Бактыбек Аманбаев абактагыларды ачкачылык жарыялоого түрткөн дагы бир жагдай тууралуу айтып берди.

— Кыргызстандын түрмөлөрүндөгү абал жакшы эмес. Тилекке каршы ал жерлердеги шарттар, камактагылардын тамак-ашы, эс алуусу, күндөлүк ал жердеги жашоога эч кандай шарттар түзүлгөн эмес.

Мындан эки жыл мурдагы маалыматтарга таянсак Кыргызстанда жалпысынан жети тергөө изолятору, 11 түзөтүү колониясы, 14 жатак абак жана аялдар үчүн дагы бир жатак абак бар. Кыргызстандагы түрмөлөр союз мезгилинде салынгандыктан учурда талапка жооп берген заманбап абактар саналуу гана экени айтылып келет.

Comments are closed.

Марал Радиосу cможет принять любую посещаемость благодаря кешированию WP Super Cache