Песков: Жапаров Москвадагы парадга катышпайт

Кыргызстандын президенти Садыр Жапаровдун Орусиянын борбору Москва шаарында Жеңиш майрамына карата өтө турган парадга катышуусу пландалган эмес. Бул тууралуу Орусия президенти Владимир Путиндин катчысы Дмитрий Песков билдирди.

Песков журналисттердин Кыргызстан президентинин 9-майда Москвага сапары тууралуу суроосуна:

«Жок, азырынча планда жок», — деп жооп берди.

Песков салатанатка дипломатиялык корпустун өкүлдөрү катыша тургандыгын айтты.

Буга чейин Песков Жеңиштин 76 жылдыгы юбилейлик дата болбогондуктан, чет мамлекеттерге атайын чакыруу жиберилбегендигин, бирок кааласа коңшу жана союздаш өлкөлөрдүн лидерлери катыша аларын билдирген.

Ал ошондой эле Москвадагы Жеңиш парадына Тажикстандын президенти Эмомали Рахмон катышарын кошумчалады. Путин менен Рахмондун жолугушуусунда, Кыргызстан менен Тажикстандын мамлекеттик чек арасындагы куралдуу жаңжал талкуулана тургандыгы айтылды.