Жергиликтүү убакыт боюнча саат 15:00гө карата шайлоочулардын 70,7 пайызы добуш берген. Мыйзамга ылайык, тизмедеги шайлоочулардын 50 пайыздан көбү добуш бергенде шайлоо өттү деп эсептелет.
Тажикстан Борбордук шайлоо комиссиясынын маалыматына караганда, өлкөдө 4 900 545 адам добуш берүү укугуна ээ. Алардын бир бөлүгү Орусияда жана Казакстанда миграцияда жүрөт.
Тажикстанда 3 375, чет өлкөлөрдө 39 шайлоо тилкеси уюштурулган. Президенттик шайлоонун жүрүшүнө дүйнөнүн беш өлкөсүнөн, алты эл аралык уюмдан, сегиз элчиликтен келген 145 байкоочу көз салып турду. Алардын арасында Европадагы Коопсуздук жана Кызматташтык Уюмунун 7 байкоочусу бар.
Президенттикке беш талапкер ат салышты:
- Көз карандысыз профсоюздар федерациясы, «Жаштар биримдиги жана Элдик-демократия» партиясынан учурдагы президент Эмомали Рахмон
- Агрардык партиядан Рустам Латифзода
- «Социал-демократтар» партиясынан Абдухалим Гаффорзода
- «Экономикалык реформалар» партиясынан Рустам Рахматзода
- Коммунисттик партиядан Миродж Абдуллоев
Эмомали Рахмон 1994-жылдан бери өткөн шайлоолордун баарында жеңишке жеткен. 2016-жылы 4-февралда Тажикстандын Жогорку соту Конституцияга киргизилген өзгөртүүлөрдү мыйзамдуу деп тапкан. Ага ылайык, президент Эмомали Рахмон шайлоого чектөөсүз катышууга укук алган.
Шайлоого негизинен бийликчил партиянын өкүлдөрү катышты. Өзүн оппозиция катары тааныштырган «Социал-демократтар» партиясы бул шайлоого бойкот жарыялаган.
Чет өлкөлөрдө жүргөн оппозиция өкүлдөрү президенттик шайлоону «мыйзамсыз» деп аташып, эл аралык уюмдарды анын жыйынтыгын тааныбоого үндөштү.
