Шашылыш кабар:

Баткенде бала бакчадан жылан чыгып, мекеме убактылуу жабылды

Баткенде бала бакчадан жылан чыгып, мекеме убактылуу жабылды
Билим жана Маданият
0

Баткен районунун Боз-Адыр айылындагы “Лилия” бала бакчасынан жылан чыгып, мекеме бир айга жабылды. Жергиликтүү бийлик өлкүлдөрү имарат бул аралыкта капиталдык оңдоп түзөөдөн өтөөрүн кабарлашты. Айылдын башка бала бакчаларында коркунуч жок. Алар өз нугунда иштеп жатат.

Баткен районуна караштуу Боз-Адыр айылынын тургуну Айнура Бектемирова. Ал, жылан үйлөргө чейин кирип келээрин,  балдарынын коопсуздугун ойлоп коркуп жашап жатканын айтып берди.

— Жылан үйлөрдөн дагы чыгат. Кууп чыгабыз. Коркуп-коркуп жашайбыз да. Бала бакчадан кандай жылан чыкканын көрбөдүм. Негизинен жыландар күн ысыганда чыгышат.

Мурда жылан турак жайлардан гана чыкса, 2-июль күнү Боз-Адыр айылында жайгашкан “Лилия” бала бакчанын жатаканасынан дагы чыккан. Бул тууралуу Өзгөчө кырдаалдар министрлигинин Баткен районунудагы өкүлү Туратбек Турдуев “Марал” радиосуна билдирди.

Маалыматка ылайык, Санитардык эпидемиялык көзөмөл кызматынын жана Өзгөчө кырдаалдар министрлигинин өкүлдөрү менен район акими бала бакчанын жеринен таанышып, абалды иликтеп көрүшкөн. Бирок имараттан эч кандай жылан табышкан эмес.

— Бирок тарбиячылардын айтканына караганда жылан буга чейин эки жолу чыккан. Биринчисинде кара чаар ала жылан чыкса, кечээ ак түстөгү жылан чыгыптыр. Болжол менен 30-40 сантиметр узундукта экенин айтышты. Иликтөөнүн жыйынтыгында ашыкча тешик байкалбагандыктан, жылан полдордун астында деген тыянакка келдик. Эртең полдор ачылат. Баткен райондук Санитардык эпидемиялык көзөмөл кызматы тарабынан дарылоо жумуштары аткарылат. 

Учурда бала бакча бир айга жабылды. Бул аралыкта имарат капиталдык оңдоп-түзөөдөн өтөт. Баткен районунун акими Кеңеш Салиев билдиргендей, окуядан эч ким жабыр тарткан эмес. Ал эми имарат бир топ жыkдан бери бала бакча катары пайдаланылып келген.

— Былтыр дагы ушундай окуя болгонун бизге эми айтышты. Азыр мекемени бир айга жаптык. Эртең полдорду алып көрүшөт, эмне болгонун такташат. 

“Лилия” балдар бакчасынын жетекчиси менен байланышууга мүмкүнчүлүк болгон жок. Бирок ушул эле айылдагы “Жетиген” атындагы бала бакча учурда ишин улантып жатканын, эч кандай коркунуч жок экенин мекеменин жетекчиси Элмира Назарова кабарлады.

— Бала бакчадан жыландын баласы чыгып калыптыр да. Ал эмес Боз-Адырда жылан үйлөрдөн дагы чыгат. Бул боюнча көпчүлүк айтып калат. Бирок бала бакчадан буга чейин чыккан эмес болчу. Жылан идиш-аякка уусун таштап коюушу мүмкүн. Ошондуктан чоң ата, чоң энелер «суунун, тамак аштын бетин жаап жүргүлө» деп айтышса керек. «Жетигенде» эч кандай коркунуч жок. Өкмөттөн, ӨКМден бат-баттан келип, бала бакчаны текшерип турушат. 

Эми мамлекеттик экологиялык жана техникалык коопсуздук боюнча инспекция Боз-Адыр айылынын элине түшүндүрүү иштерин жүргүзөт. Ал эми бала бакча оңдолуп бүтсө, айыл өкмөтү тарабынан көзөмөлгө алынаарын аталган мекеменин Баткен райондук башкармалыгынын орун басары Канатбек Сейдалиев маалымдады.

— Айыл өкмөтүнүн буйругу менен комиссия түзүлүп, анын негизинде капиталдык ремонттон өткөн бала бакча кайрадан кабыл алынат. Эгер жылан кызыл китепке жазылган богондо, аны кармап, тоого алып барып коё бермекпиз. Бул жыландар жөнөкөй талаа жыланы экен. Талаадагы жыландарды көзөмөлгө ала албайбыз, бирок түшүндүрүү иштерин жүргүзөбүз. Бала бакчага барып, жетекчилик, жумушчулар менен сүйлөшүп, өзгөчө кырдаалда биринчи кайда кайрылышы керектигин айтабыз.

Кошумчалай кетсек, “Лилия” бала бакчасында эки кезмет менен 50 бала тарбияланып жаткан.

Comments are closed.

Марал Радиосу cможет принять любую посещаемость благодаря кешированию WP Super Cache