Нарында жаңы оорукана пайдаланууга берилди

Бүгүн, 17-июнда Нарын облустук бириктирилген ооруканасынын жугуштуу оорулар бөлүмү үчүн курулуп жаткан имарат пайдаланууга берилди. Бул тууралуу Өкмөттүн Нарын облусундагы ыйгарым укуктуу өкүлчүлүгүнүн маалымат бөлүмү билдирди.

70 орундуу имараттын курулуш иши зарылчылыктан улам 2020-жылы август айында башталып, 79,2 миллион сомдун тегерегиндеги каражатка бүткөрүлдү. Курулуш ишин «Мерибелл Текстиль Иншаат» жоопкерчилиги чектелген коомунун подряддык ишканасы жүргүздү.

Имараттын 48 койкасы бокс палаталарда, 22 койкасы реанимация жана интенсивдик палаталарда жайгашкан. Мында дарыгерлер жана бейтаптар үчүн бардык ыңгайлуу шарттар түзүлгөн.

Министрлер кабинетинин атынан жугуштуу оорулар бөлүмүнө жалпы суммасы 3,5 миллион сомдук акцент генераторлор, ИВЛ аппараттары, кислороддук концентраторлор жана мониторлор тапшырылды.