Жалалидин Рахматуллаев соңку жумада вирус күчөгөнүн белгиледи (видео)

Ушул жылдын апрель айынан тарта коронавируска чалдыккандардын саны өсүүдө. Бул тууралуу Саламаттыкты сактоо жана социалдык өнүктүрүү министринин орун басары Жалалидин Рахматуллаев бүгүнкү брифингде билдирди.

Анын айтымында, акыркы 7 күн ичинде оорунун жайылуу көрсөткүчү (репродуктивдүү саны — жугуштуулугу) Rt 1,3 түздү.

«Пандемия башталгандан бери коронавирустук инфекциянын эки толкуну 2020-жылдын июль жана ноябрь айларында катталды. Бүгүнкү күндө, тилекке каршы, үчүнчү толкун байкалууда«, — деди Рахматуллаев .

Ошондой эле Рахматуллаев коронавирустун катталган британ, түштүк-африка, индия штаммдары төмөнкү санитардык-гигиеналык жана эпидемиологиялык талаптарды аткарбаган шартта калк арасында оорунун көбөйүшүнө таасирин тийгизиши мүмкүндүгүн белгиледи:

• коомдук жайларда беткап режимин, колдун гигиенасын сактабоо;
• чектөөлөргө карабастан маданий массалык жана салтанаттуу иш-чаралардын өткөрүлүшү;
• коомдук тамактануу жайларында, транспортто, соода борборлорунда, базарларда жана башка жайларда аралыкты сактабоо;
• вирустук инфекциянын белгилери бар адамдардын мектепке, жумушка жана коомдук жайларга баруусу.