Орусия менен жаратылыш газынын баасын төмөндөтүү боюнча сүйлөшүүлөр жүрүүдө

Кыргыз өкмөтү Орусия тарап менен жаратылыш газынын баасын төмөндөтүү боюнча сүйлөшүүлөрдү жүргүзүүдө. Бул тууралуу вице-премьер-министри Эркин Асрандиев билдирди.

— Биз Орусия менен жаратылыш газынын чыккан баасын төмөндөтүү жана эсептешүүлөрдү улуттук валюта менен жүргүзүү үчүн  сүйлөшүүлөрдү активдүү жүргүзүп жатабыз. Бул биз үчүн өтө аярлуу маселе болуп саналат, — деди вице-премьер-министр.

Эркин Асрандиев бүгүнкү күндө көгүлтүр оттун баасын жөнгө салуу Орусия менен түзүлгөн эки тараптуу келишимдин негизинде жүргүзүлөрүн эске салды.

— ЕАЭБ тууралуу келишимге ылайык, газдын жалпы рыногун түзүү 2025-жылга пландалууда. Учурда Кыргызстан өзүнүн чек арасында газды Кыргыз Өкмөтүнүн жана Орус Өкмөтүнүн ортосундагы жаратылыш газын ташуу, бөлүштүрүү жана сатуу чөйрөсүндө кызматташуу тууралуу Келишимге ылайык сатып алат , — деди Асрандиев.

Учурда ЕАЭБдин 2025-жылга чейинки стратегиялык багыттары тууралуу документти иштеп чыгуу аяктап, анын алкагында газ ташуунун тарифи талкууланып жатат.

Бул маселени 19-майда мамлекет башчылары Жогорку Евразиялык экономикалык кеңештин отурумунда талкуулашкан, анда Кыргызстан газды ташып жеткирүү тарифтерин чыгарылган өлкөгө карабастан, дискриминациялык эмес мамилелерди колдоору белгиленген.