Жефф Безос Хашшогги тууралуу: «Мындай окуя эч кимдин башына келбесин»

Былтыр Стамбул шаарындагы Сауд Аравия консулдугунда киши колдуу болгон журналист Жамал Хашоггини эскерүү иш-чарасы консулдуктун жанында өттү. Ага америкалык миллиардер, «Amazon» компаниясынын түзүүчүсү жана журналист иштеген «Washington Post» басылмасынын ээси Жефф Безос катышты.

Хашоггини эскерүү саат 13:14тө үнсүз мүнөт менен башталды. Бир жыл мурун дал ушул убакытта журналист консулдукка кирип кеткен болчу, ал эми жубайы Хатиже Женгиз сыртта күтүп калган.

---

Ханзаада журналист Хашоггинин өлүмүнө жоопкерчиликти мойнуна алды

---

Хатиже Женгиз өз сөзүндө чындыкты дале издеп жүргөнүн айтты:

«Мен анын сөөгү эмне болгонун, кайда экенин билгим келет. Досторунун абактан чыгуусун каалайм. Ошондой эле бийликте тургандар жоопкерчиликке тартылуусун каалайм».

Ал эми Безос: «Эч ким,  эч качан сиз башыңыздан өткөргөндү көрбөшү керек. Сиз бул көчөдө сааттап жүрдүңүз, күттүңүз. Бирок ал ошол бойдон чыккан жок. Бул нерсени элестетүүнүн өзү кыйын. Дайыма эсиңизде болсун, сиз – биздин жүрөгүбүздөсүз. Сиз жалгыз эмессиз, биз жаныңыздабыз», — деп Хашоггинин жубайын бооруна кысты.

---

Журналисттин өлүмүнө бир жыл: Хашоггини кантип өлтүрүшкөн? (стенограмма)

---

Ошондой эле эскерүү иш-чарасына «Amnesty International» жана «Репортеры без границ» эл аралык уюмдарынын өкүлдөрү, дүйнөлүк Нобель сыйлыгынын лауреаты, укук коргоочу Тавакуль Карман жана сотсуз өлүм жазасы маселеси боюнча БУУнун өкүлү Аньес Каламар катышты.