Көкөмерен дарыясынан кичине кыздын сөөгү табылды

Көкөмерен дарыясына түшүп кеткен унаадагы адамдарды издөө иши бүгүн да уланып, натыйжада кичине кыздын сөөгү табылды. Бул тууралуу Өзгөчө кырдаалдар министрлигинин маалымат кызматы билдирди.

Маалыматка ылайык, бүгүн, 4-июлда издөө иштерине 106 куткаруучу тартылып, саат 19:30дар чамасында кичине кыздын сөөгүн табышкан. Калган адамдарды издөө эртең да уланат.

Эске салсак, 30-июнда Жайыл районунда өтүп жаткан Кожомкул Каба уулунун 130 жылдык мааракесине бараткан унаа Көкөмерен дарыясына түшүп кеткени боюнча маалымат Жайыл райондук Ички иштер бөлүмүнө ошол күнү саат 10:00дө келип түшкөн. Болжол менен унаанын ичинде 5 адам болгону айтылган.

Издөө иштеринин натыйжасында 2-июль күнү Жумгал районундагы Арал айылына жакын жерден унаанын айдоочусунун жана Өкмөттүн Чүй облусундагы ыйгарым укуктуу өкүлүнүн Аппарат жетекчиси Молдакун Абдылдаевдин сөөгү табылып, ИИМ кызматкерлерине өткөрүлүп берилген.