Бүгүн Китеп белек берүүнүн эл аралык күнү белгиленет

Бүгүн, 14-февралда Ош жана Бишкек шаарларында Китеп белек берүүнүн эл аралык күнү белгиленет. Бул тууралуу уюштуруучу Асель Абыкеева «Маралга» билдирди.

«Book Giving Day» иш-чарасынын максаты элге китепти белекке берүүнүн баалуу экендигин жайылтуу болуп саналат. Уюштуруучулардын айтымында, мындай саамалык былтыр да өткөрүлгөн. Быйыл да көпчүлүктүн суранычы менен кайрадан уюштурулууда.

Бишкектеги иш-чара Москва мамлекеттик университетинин илимий билим берүүчү мектеп-комплексинде саат 11:00дө башталат.

Ал эми Ош шаарындагы саамалык «ОлолоХауста» өтөт.

Китеп майрамына кирүү билети – китеп болуп саналат. Каалаган адамдардын баары үчүн эшик ачык. Иш-чаранын шарты боюнча катышуучулар бири-бирине китеп белекке беришет. Саамалыкты китеп мукабасын кооздоо, тез окуу боюнча чеберчилик сабактар коштойт.