БУУ бардык өлкөлөрдү коронавируска каршы күрөштө ДССУну колдоого чакырды

БУУнун башкы катчысы Антонио Гутерриш коронавирус пандемиясына каршы күрөшүүдө бардык мамлекеттерди Бүткүл дүйнөлүк саламаттыкты сактоо уюмун (ДССУ) колдоого чакырды.

АКШнын Мамлекеттик департаменти буга чейин өлкө ДССУдан 2021-жылдын июль айында чыгарын жарыялаган.

Мамлекеттик департаменттин өкүлү Морган Ортагус ДССУ COVID-19 пандемиясы учурунда гана эмес, ондогон жылдар бою башка өзгөчө кырдаалдарда да ийгиликсиз болгонун, реформаларды жүргүзбөгөнүн, анын ичинде «Кытайдын Коммунисттик партиясынан көз карандысыздыгын» көрсөтпөгөнүн билдирди.

«Мен бардык мүчө мамлекеттерди бири-бирибизди жана БУУнун тутумун учурдагы кыйынчылыктарды, анын ичинде учурдагы саламаттыкты сактоо кризисин чечүүдө уюмду колдоого чакырам. COVID-19га каршы күрөштүн ушул оор мезгилинде ДССУ мүчө мамлекеттердин колдоосуна муктаж экендигин ачык айттым», — деди Гутерриш РИА Новостиге берген маегинде.

11-мартта Бүткүл дүйнөлүк саламаттыкты сактоо уюму жаңы коронавирустук COVID-19 инфекциясын пандемия деп жарыялаган.

ДССУнун акыркы маалыматтары боюнча, дүйнөдө 28,9 миллиондон ашык адам инфекцияны жуктуруп алган. Илдеттин кесепетинен 922 миңден ашуун адам каза тапты.