Гебрейесус: пандемия «узакка созулушу мүмкүн»

Коронавирус пандемиясы «узакка созулуп», анын кесепеттери жакынкы ондогон жылдар бою сезилиши мүмкүн. Бул тууралуу Дүйнөлүк саламаттык сактоо уюмунун башчысы Тедрос Гебрейесус билдиргендигин чет элдик басылмалар жазды.

1-августта ДССУнун Өзгөчө кырдаалдар комитети коронавирус инфекциясына байланыштуу эл аралык өзгөчө кырдаал киргизилген алты айдагы абалга баа берүү үчүн чогулду. Анын жыйынтыгында комитет азыр пандемия менен күрөшүп жаткан мамлекеттерде «күрөштөн чарчап калуу коркунучу бар экенин» эскертти.

Буга чейин айрым эксперттер менен саясатчылар, анын ичинде АКШнын президенти Дональд Трамп ДССУну «эпидемияга карата өтө жай реакция кылды» деп айыптап чыгышкан. Уюмдун башчысы 1-августтагы жыйында эл аралык өзгөчө кырдаал Кытайдын сыртында коронавирустан эч ким каза боло электе жарыяланганын билдирди.

Жонс Хопкинс университетинин маалыматына ылайык, дүйнө боюнча вирус жуктургандардын саны 18 миллиондон ашып, 700 миңге жакын киши каза болду.

Коронавируска кабылгандардын саны көбөйүп жатканына карабастан Германиянын баш калаасында 1-августта 20 миңдей адам карантинге каршы демонстрацияга чыгышты. Полиция аларды күч менен таратты.

Америка Кошмо Штаттары дүйнөдө коронавирустан эң жабыркаган өлкө бойдон калууда. Өлкөдө COVID-19 илдетине 4,6 миллион адам кабылып, 154 миң киши көз жумду.

Жазында карантиндин жардамы менен бул илдетке каршы күрөштө ийгиликке жетишкен штаттарда да коронавирусту жуктуруп алгандар көбөйүп жатат.

Түштүк Африка мамлекетинде бул ооруга чалдыккандардын саны жарым миллиондон ашып, дүйнөдө бешинчи орунга чыкты. Алдыңкы беш орунда АКШ, Бразилия, Индия жана Орусия кирет.

Ал эми өлүмдүн саны боюнча АКШ, Бразилия жана Мексика сап башында турат.