Лейлек: Чек арачылар каналдан артиллериялык снаряддарды табышты

Лейлек районунун чек арачылары артиллериялык снаряддарды табышты. Бул тууралуу Мамлекеттик чек ара кызматынын коомчулук менен байланыш бөлүмү билдирди.

Маалымат боюнча, Жаңы-Жер айыл аймагына караштуу Борбордук айылындагы каналды кароо убагында чек арачы тарабынан 82 мм. калибрдеги 3 артиллериялык снаряд табылган.

Табылган курал боюнча дароо «Жаны-Жер» чек ара тозотуна кабар билдирилген. Коопсуздукту камсыздоо максатында чек ара кызматкерлери тийиштүү структуралар менен биргеликте аталган айлананы курчоого алышып, тиешелүү документтер түзүлгөндөн кийин, снаряддар жардыруу жолу менен жок кылынган.