Түнкү клубда баңгизат саткан жаран кармалды

Бишкек шаарында түнкү клубдардын биринде баңгизаттарды жайылтуу фактысы аныкталды. Бул тууралуу Ички иштер министрлигинен кабарлашты.

Жазык кодексинин 267-беренесинде көрсөтүлгөн «Сатуу максатын көздөп баңги каражаттарын мыйзамсыз даярдоо» жүргүзүлгөн тергөө жана ыкчам-издөө иш-чараларынын натыйжасында азиат улутундагы 30-32 жаштагы жаран баңгизаттарды сатуу менен алектенген туруктуу канал ачып алганы аныкталган.

Тинтүү иш-чараларын жүргүзүү учурунда клубдун барында диджей болуп иштеген коңшу өлкөнүн 1991-жылы туулган К.У. аттуу жараны кармалган.

Ага өздүк кароо жүргүзүүдө шымынын чөнтөгүнөн кендир жытына ээ болгон кара-күрөң түстөгү зат табылып алынган. Ошондой эле анын бөлмөсүн тинтүүдө ушул сыяктуу зат да алынган.

Сотко чейинки өндүрүш иши жана аталган кылмышка тиешеси бар башка жактарды аныктоо боюнча тергөө-ыкчам иш-чара улантылууда.