Республикалык штаб жергиликтүү бийлик органдарына бир катар тапшырмаларды берди

Министрлер кабинетинин төрагасынын орун басары Жылдыз Бакашованын жетекчилиги астында Республикалык штабдын кезектеги кеңешмеси болуп өттү.

Кеңешмеде өлкөдөгү эпидемиологиялык абал, коронавирус инфекциясынын жайылышын токтотуу боюнча көрүлүп жаткан чаралар, COVID-19дун жүрөк-кан тамыр ооруларына жана андан каза болуу көрсөткүчүнө тийгизип жаткан таасири, чет өлкөлөрдө жашаган жана иштеген кыргызстандыктарды эмдөөнүн жүрүшү боюнча маселелер каралды.

— «Саламаттыкты сактоо жана социалдык өнүктүрүү министрлиги өзгөчө көңүлдү жүрөк-кан тамыр ооруларынан, кант диабети жана онкологиялык оорулардан жабыркаган бейтаптарга бурушу кажет. Мындан тышкары, жайкы сезондун башталышын эске алуу менен туристтик эс алуу жайларында санитардык ченемдердин тыкыр сакталышын камсыздоо зарыл» , — деди Бакашова.

Ыкчам штабдын кеңешмесинин жыйынтыгы боюнча мамлекеттик жана жергиликтүү бийлик органдарына бир катар тапшырмалар берилди:

• Атап айтканда, коронавирус инфекциясын, пневмонияны диагностикалоо жана дарылоо боюнча медицина кызматкерлерин окутууну үзгүлтүксүз жүргүзүүнү, ошондой эле COVID-19 жана пневмония менен ооруган жарандарды клиникалык протоколдун 5-версиясына ылайык реабилитациялоо жүргүзүүсү тапшырылды.
• Экономика жана финансы министрлиги менен биргеликте бир жумалык мөөнөттө «кызыл зонада» иштеген дарыгерлерге бир жолку материалдык кенемте төлөө маселесин чечүүнү тапшырды.
• Бейтаптарды дарылоо үчүн стационарларда «кызыл зоналарды» түзүү менен катар саламаттыкты сактоо уюмдарында жугуштуу эмес ооруларга – жүрөк-кан тамыр, кант диабети, онкологиялык, өнөкөт респиратордук ооруларга, психикалык ооруларга чалдыккан бейтаптарга медициналык көмөк көрсөтүү үчүн койка-орундардын жетиштүү санын камсыздоо тапшырылды.

Министрлер кабинетинин облустардагы ыйгарым укуктуу өкүлдөрүнө, Бишкек жана Ош шаарларынын мэрияларына эпидемиологиялык кырдаал боюнча өз учурунда чечим кабыл алуусу тапшырылды.