Комендант велосипед теппей турууга чакырат

Атайын себепсиз велосипед тебүү үчүн эле сыртка чыккандардын велосипеддери убактылуу алынат. Бул тууралуу Бишкек шаарынынын коменданты А. Орозалиев билдирди.

— Шаарда велосипед тебүүдөн карманууга чакырам. Өзгөчө абал режиминин талаптарын бузуп, шаарга себепсиз чыксаӊыздар, велосипеддериӊиздер убактылуу алынат. Жакшы аба ырайына карабастан, ата-энелерден балдары менен сейилдебөөнү суранам, — деди Орозалиев.

19-апрелден 20-апрелге карата республиканын өзгөчө абал режими киргизилген шаарларында жана аймактарында 81 киши коменданттык саатты бузганы үчүн кармалып, 8 автоунаа атайын жайларга токтотулган. Алардын 66сы Бишкекте.

Бул арада Түркмөнстанда президент Гурбангулы Бердымухамедов 19-апрелде, 20 чакырымга веложүрүш жасады. Кошумчалай кетсек, аталган өлкөдө коронавирустун атын айтууга тыюу салынган. Түркмөнстан вирус катталбаган өлкөлөрдүн катарында.