Өкмөт өлкөнүн бардык аймактарында «Ишкерлерди тейлөө борборлорун» түзөт

Бизнести жүргүзүү боюнча ишкерлерди колдоо жана аларга так маалымат, кеңеш берип туруу максатында Кыргыз Өкмөтү региондордо «Ишкерлерди тейлөө борборлорун» түзүүнү пландады.

Бул тууралуу Өкмөттүн маалымат кызматы кабарлады.

«Ишкерлерди тейлөө борборлорунун» кызматтарын Ош, Жалал-Абад, жана Баткен шаарларындагы ишкерлер пайдаланууда. Бул демилгенин башкы максаттарынын бири – ишкерлерди колдоо жана алардын дараметин бекемдөө болуп саналат.

“Бүгүнкү күнү Өкмөт тарабынан бизнести өнүктүрүү үчүн зарыл шарттар түзүлүп жатат. Аймактык долбоорлорго жана субъекттерге инвестициялардын агымын тартуу максатында жаңы түзүлгөн ишканаларга 5 жылдан 10 жылга чейин салык төлөөдөн бошотуулар каралган. Алар – мүлк салыгы, жер салыгы, пайда салыгы жана сатуудан түшкөн салыктар.

Мындан тышкары ата мекендик айыл чарба чийки затын кайра иштетип жаткан ишканалардын субъектилери (подакциздик товарлардын тобунан тышкары) КНСти 80% азайтуу менен төлөшөт”, — деп айтылат билдирүүдө.

Ошондой эле, ата мекендик продукцияларды экспорттоого тийиштүү шарттарды түзүү максатында региондордо ветеринардык лабораториялар түзүлүп иштеп жатканы айтылат. Лабораториялык жабдууларды, диагностикумдарды жана биодарыларды сатып алуу үчүн Кыргыз Өкмөтү 150 млн сом бөлүп берген.