Кыргыз ЖОЖдорунун өкүлдөрү Индияда өткөн саммитке катышты

Кыргызстандын жогорку окуу жайларынын өкүлдөрү Индияда өткөн жогорку билим берүү боюнча саммитинде катышышты. Бул тууралуу Билим берүү жана илим министрлигинен кабарлашты.

Иш-чара 30-октябрдан 1-ноябрга чейин жогорку билим берүү боюнча «FICCI-2018 Келечектин университеттери” аталышында өттү. Ага дүйнөнүн 50дөн ашык өлкөлөрүнөн келген кызматкерлер катышкан. Кыргызстандан жогорку окуу жайлардын, академиялардын, ЖОЖдордун бирикмелеринин жана башка уюмдардын өкүлдөрү барды.

Иш-чаранын жүрүшүндө Кыргызстандын делегациясы билим берүү боюнча көргөзмөнүн 60га жакын катышуучулары менен жолугушту. Анда жогорку окуу жайлардын программалары менен таанышып, медициналык, IT багыттары боюнча кызматташуу маселелерин, студенттеринин академиялык мобилдүүлүгүн талкуулашты.