Коронавирустун үчүнчү толкунуна 200 млн сом камдалды

Милдеттүү медициналык камсыздандыруу фонду (ММКФ) тарабынан коронавирустун үчүнчү толкунуна 200 млн сом даярдалды. Бул тууралуу аталган фонддун төрагасы Артурбек Жуманазаров брифинг учурунда билдирди.

Анын айтымында, ооруканаларда 227 млн сомго дары-дармек бар.

«Бир айлык керектөө 95 млн сом деп эсептелген. Бизде 227 млн сом бар, бул эки айга кенен жетет. Мамлекеттик материалдык резервдер фондунан дагы 57 клиникага дары-дармек берилген», — дейт ал.

Кыргызстанда пандемия башталгандан бери жалпы 89 миң 660 адам коронавирус жуктурган. Алардын ичинен 85 миң 607 киши айыгып чыкса, 1 миң 516 адам каза болду.