«Манаска каршы чыккан кишинин жакшы болгонун уккан эмесмин»

Манаска каршы чыккан кишинин жакшы, ага күйгөн кишинин жаман болгонун уккан эмесмин. Мындай оюн манасчы Дөөлөт Сыдыков «Маралга» берген маегинде билдирди.

Ал угармандын: «Өлкөдө илдет күч алып турганда «Манас» айтуунун зарылчылыгы бар беле?» — деген суроосуна төмөнкүдөй жооп берди:

«Манасчы келет дегенде:

Байлатма жинди соо болгон, 

Жин-шайтан качып жоголгон», — деп илгертен айтылган кеп бар. Илгеркилер ылаңдаган мал, ооруп калган жан болсо «Манас» айттырган. Эли-журтубузду колдоп, эл-жерибиз кемибесин деп «Манас» айттык. Бабаларга шек келтирбөө керек. «Манаска» каршы чыккан кишинин жакшы, ага күйгөн кишинин жаман болгонун уккан эмесмин», — деди Сыдыков.

Ушул жылдын 12-ноябрында Дөөлөт Сыдыков Ала-Тоо аянтында 14 саат 27 мүнөт 51 секунд «Манас» айтып, дүйнөгө рекорд койгон.