Москвадан 460 кыргызстандык учуп келди

Бүгүн, 7-июнда, Бишкекке Москвадан 460 кыргызстандык жаран, анын ичинде 2 жашка чейинки 68 бала учуп келди. Бул тууралуу Тышкы иштер министрлигинен билдиришти.

Кыргызстандык жарандар «Аэрофлот» авиакомпаниясынын учагы менен учуп келген.

Министрликтен билдиришкендей, мекенине кайтууну каалаган жарандардын саны көп болгондуктан, келе турган жарандардын тизмеси Москвадагы кыргыз медициналык клиникаларынын дарыгерлеринен, кыргыз диаспорасынын, Кыргызстандын Орусиядагы элчилигинин өкүлдөрүнөн турган комиссия тарабынан түзүлгөн.

Тандоо жарандардын кайрылууларынын, анын ичинде кош бойлуу жана кичинекей балдары бар аялдардын, оор илдети бар, кары адамдардын кайрылууларынын негизинде жүргүзүлгөн. Келүүнү каалагандар көп болгондуктан, жарандардын мындан мурда «Аэрофлот» компаниясынын аба каттамдарына билет сатып алып, бирок эпидемиологиялык кырдаалга байланыштуу каттамдар болбой, учуп кете албаганы эске алынган.

Учуп келген жарандардын баары обсервацияга жаткырылган.

Мекенине кайтып келүүнү каалаган чет жердеги Кыргызстандын жарандарын өлкөгө кайтаруу боюнча иштер улантылууда.