Ош: жасалма өткөрмө кагаздары менен жүргөн 10 жаран кармалды

Ошто өзгөчө абал киргенден бери жасалма өткөрмө кагаздары менен жүргөн 10 учур катталды. Бул тууралуу Ош шаарынын, Кара-Суу жана Ноокат районунун коменданты Малик Нурдинов билдирди.

Анын айтымында, жасалма өткөрмө кагаздары менен жүргөн 10 учурдун баарына иш козголду.

— Максатсыз колдонгондорго аёосуз чара көрүлөт. Айрымдар уруксат кагаздарын жардам көрсөтүү үчүн алып, бир-эки жолу жардам берип, калган учурда өзүнүн керектигине колдонгон учурлар байкалууда. Ал эми азык-түлүк ташыгандарга өткөрмө кагаз керек эмес. Ун, азык-түлүк жүктөп келе жаткандарды эч ким токтотпойт, — дейт комендант.

Комендант кошумчалагандай, Ошто коменданттык саат учурунда көчөдө жүргөн 10 жаран кармалды.

Коронавируска байланыштуу Кыргызстандын Бишкек, Ош, Жалал-Абад шаары, Ноокат жана Кара-Суу, Сузак райондорунда 2020-жылдын 25-мартынан саат 08.00дөн баштап 15-апрелине саат 08.00гө чейин өзгөчө абал киргизилген.