Биз менен байланышыңыз

Атамбаевдин бизнес-өнөктөшү Субихи Пархати кармалды

Кыска кабар | 15 Окт 2019 | 247 | 0

Мурдагы президент Алмазбек Атамбаевдин бизнес-өнөктөшү деп айтылып келген Субихи Пархати колго түштү. Аны Аскер прокуратурасы кармаган. Бирок, Башкы прокуратура бул боюнча азырынча эч кандай маалымат айта элек.

Бишкектин Биринчи Май райондук соту кечээ 14-октябрда ага карата өлкөдөн сыртка чыкпоо боюнча бөгөт чарасын аныктаганын аталган соттун расмий өкүлү Асел Равшанбековага таянып, «Азаттык» жазды.

— Соттун токтому менен эч жакка кетпөө бөгөт чарасы тандалды. Ага карата ушундай бөгөт чарасын тандоону тергөө сунуштаган, — деген Асел Равшанбекова.

Бизнесмен буга чейин издөөгө алынган. Алдын ала маалымат боюнча Субихи Пархати мурдагы президент Атамбаевдин кирешелерин легалдаштырган деп айыпталууда.

Пархати 2017-жылдын 27-октябрында мурдагы президент Алмазбек Атамбаевге тиешелүү илимий өндүрүштүк «Форум» ЖЧКсына теңшерик негиздөөчү болгон. Бирок 2018-жылдын 18-апрелинде «Форум» кайра каттоодон өтүп, жападан жалгыз Субихи Пархатиге тиешелүү болуп калган.

Атамбаевди кол тийбестиктен ажыратууну караган депутаттык комиссия Пархати «Форумду» Атамбаевден 54 млн сомго сатып алганын тактаганын билдирген.

Copyright © 2017 Maral FM