Каптагаев: Атамбаев Жээнбековду жарга такап койду

Саясатчы Эмилбек Каптагаев «Марал» радиосуна берген маегинде экс-президент Алмазбек Атамбаев Матраимовдор маселеси боюнча өлкө башчы Сооронбай Жээнбековду жарга такап койгонун билдирди.

Анын айтымында, Атамбаев бул кадамы менен бет тырмалык кылып жатат. Анткени, Мамлекеттик бажы кызматынын төрагасынын мурдагы орун басары Райымбек Матраимов коррупционер болсо, Атамбаев аны кызматтан бошоткондо, дароо камашы керек болчу.

Өткөн президенттик шайлоодо КСДП 350 миңдей добушту Ош облусу менен Ош шаарынан алган. Атамбаев аны билет. Ал ошондуктан, кийинки президенттик шайлоодо өлкө башчы Жээнбековдун саясий бекемделүүсүнө жол бербей, саясий тамырын кыркуу максатында Матраимовду атайын алып чыгып, Жээнбековдун кекиртегине бычак такады.

«Мындан улам, Матраимов өлкөдө саясий маселеге айланды. «Мындан аркы саясий аренадагы күрөштүн борбору каякты карай оойт? — деген жагдайда Жээнбековдун кийинки кадамдары кандай болот? Матраимовду жоопкерчиликке тартууга чейин жеткире алабы же жокпу?» — деген суроо саясаттын индикаторун аныктоочу маселе. Бул жерде Атамбаев да чоң саясатчы, андагы тажрыйба көп кишиде жок», — дейт Каптагаев.

Ал кошумчалагандай, Жээнбеков коррупция менен күрөш жүрүп жатканын көп жерде айтканы менен иш жылбай жатат. Бийликтин «Матраимовдун ишин карап жатабыз» деген кашаңдыгы элде көп ой жараттууда. Бийлик ишти кечеңдетип, карабай жатат.