Мартта Бишкекке 60 жаңы автобус келет

Үстүбүздөгү жылдын март айынын аяк ченинде борбор калаага 60 жаңы автобус келет. Бул тууралуу «Бишкек жүргүнчүлөр автотранспортишканасы» муниципалдык ишканасынын бөлүм башчысы Сатыбалды Хакимов “Марал” радиосуна берген маегинде билдирди.

Анын айтымында, келе турган автобустар газ менен жүрөт. Бир унаа жалпысынан 110 жүргүнчүгө ылайыкталган. Автобустардын баасы 72 миң долларды түзөт.

«Кытайдын автобустарын алабыз. Алар Орусиянын автобустарынан кем калбайт. Тендердин негизинде 60 автобус алдык. Аларга тендердик комиссия жооп берет. Транспортто 30 орун болот, алар желимден жасалган эмес. Унаада мүмкүнчүлүгү чектелген адамдарга дагы шарттар каралган. Жаңы автобустар келсе жарандардын сунуштары каралып, эске алынат», — дейт Хакимов.

Анын билдиргенине караганда, шаардагы кичиавтобустарды толук алмаштыруу үчүн 800 даана автобус керектелет. Учурда шаар тургундарын 110 автобус тейлеп келет.

Хакимов шаардык мэрия жыл сайын 60 автобус сатып алса, 5 жылдын ичинде коомдук транспортко болгон муктаждык жоюларын белгилейт.

Маалыматка ылайык, калаанын автопаркы акыркы 10 жылдан бери жаңылана элек. Бишкек мэриясынын сайтында колдонуу мөөнөтү аяктагандыктан сатыкка чыга турган автобустар боюнча маалымат бар.