Шашылыш кабар:

Парламент: КТРК саясий балансты сактай албай жатат

Июнь 6th, 2018 | by Анара Бакытбекова
Парламент: КТРК саясий балансты сактай албай жатат
Саясат
0

Бүгүн Жогорку Кеңештин жалпы жыйынында Коомдук телерадиоберүү корпорациясынын 2017-жылдагы иши жөнүндө мекеменин Байкоочу кеңеши отчет берди. Байкоочу кеңештин төрагасы баяндама жасап, КТРКнын 5 каналдан турган радиоуктуруулар бирикмесинин ишине оӊ баа берилгенин белгиледи. Деген менен эл өкүлдөрү КТРКнын Байкоочу кеңеши коомдогу саясий балансты сактай албай жатканын сынга алды.


КТРКнын өткөн жылдагы ишине Байкоочу кеңештин бир гана мүчөсү Азамат Болгонбаев «канааттандырарлык» эмес деген баа берген. Калган мүчөлөрү ишине оң баа берип, отчетту колдогон.

Мыйзам боюнча, Байкоочу кеӊеш бир жылда төрт жолу жыйын өткөрүүгө тийиш, бирок айрым бир муктаждыктарга байланыштуу 13 ирет кезектеги жана кезексиз жыйын өткөргөн. Мунун себеби бар экенин Байкоочу кеңештин төрагасы Жыпар Жекшеев билдирди.

Анын айтымында, кеңеш негизинен КТРКнын контентин жакшыртуу, санариптик көрсөтүүгө өтүүгө даярдык көрүү маселелери, материалдык-техникалык абалды жакшыртуу чаралары, каржылык-чарбачылык иштери сындуу кечиктирилгис маселелерди карап келди.

Телекөрсөтүүлөр менен радиоуктурууларга такай монитортинг жүргүзүлүп келет. Мисалы, өлкө аймагы боюнча жүргүзүлгөн мониторигдин жыйынтыгында, КТРКнын 5 каналдан турган радиоуктуруулар бирикмесинин ишине оӊ баа берилди. Байкоочу кеӊешке түшкөн каттар кат ээлеринин катышуусунда каралып, айрымдары тийиштүү мамлекеттик органдардын кароосуна да жөнөтүлүп турат.

Мындан тышкары, Жекшеев КТРКда 908 адам иштээрин, бирок маянасы аз, турак жайлары жок болгондуктан, мыкты адистер менен журналисттердин жумуштан кетүүсү улам арбып баратканы байкалып жатканын кошумчалады.

Жогорку Кеңештин депутаттары КТРКнын Байкоочу кеңеши коомдогу саясий балансты сактай албай жатканын сынга алды.

“Ата Мекен” фракциясынын депутаты Садык Шер-Нияз Коомдук Биринчи канал айрым саясий иштерди чагылдырууда  талаптарды  аткарбай жатат деп эсептейт.

Мисалы Жогорку Кеңештин депутаттары Өмүрбек Текебаев, Канат Исаев жана башка депуттарды жөнсүз каралап турганда, Байкоочу кеңеш үн катпастан карап отурушкан. Андан кийин шайлоо учурунда  да  айрым нерселерге көз жумушту. Эми азыркы учурда КТРК 180 градуска бурулуп, бир кездерде  ошолордун кызматын аткарып, камчысын сүйрөгөндөрдү каралоого өттү. Бирок күнөөсүздүктүн презумпциясы деген түшүнүктү Байкоочу кеңеш бекем сакташ керек. Кыйын кезекте акыйкат сөзүн айта турган, нейтралдуу болсун деп Байкоочу кеңеш шайланган. Тилекке каршы ошол жумушту жакшы аткара албай, көпчүлүк  нааразычылык КТРКдан башталып,ал парламентке жетип отурат. Ошондуктан Байкоочу кеңеш өз жумушун так аткарган,  коомду тазалоочу күч деп эсептелинүүсү керек.

Мындай пикирди башка да депутаттар белгиледи.

Жыйында аталган телеканалга республикалык бюджеттен 7-8 жылдар бери бирдей эле каражат бөлүнүп келе жатканы талкуу жаратты. Каржы министринин орун басары Улукбек Кармышаков жылына болжол менен 35-30 млн сом  каражат кошулуп бөлүнүп, каржылоо көбөйүп келе жатат дейт.

 2015-жылы бюджеттен КТРКга 400 миллион сом бөлүнгөн. 2016-жылы 439 миллион 300 миң сом бөлүнгөн. Ал эми 2017-жылы 475 миллион сом бөлүнгөн. Андан тышкары 2017-жылы көчмө студияны сатып алууга 70 миллион сом пайызсыз бюджеттик насыя бергенбиз. Бюджет көбөйбөй жатат деген туура эмес. Бул маалымат чындыкка жатпайт.

КТРКнын жетекчиси Илим Карыпбеков каржы министринин орун басарын бюджет тууралуу жалган маалымат таратып жатканын айтып күнөөлөдү.

— Бюджетти билбейт экен. Үстүртөн эле сандарды көрүп алып айтып жатат. Биринчиден кайсы беренелер боюнча көбөйгөнүн айтыш керек эле да. Ал каражат Орусиянын биринчи каналын трансляция кылуу үчүн РПО РМТРге КТРК аркылуу которулуп туруучу каражат. Ал эми КТРдин соцфонду, айлыгы же башкасы бир тыйынга да көбөйгөн жок. Ал эми көчмө студияга бөлүнгөн каражатты биз ссуда кылып алганбыз. Аны биз ай сайын төлөп берип атабыз. Ошону тактап алып туруп анан маалымат бериңиз, элди калпычы кылбай.

Ошондой эле, Карыпбеков «КТРК бир жактуу иштеп жатат» деген айыптоолорду токтотуш үчүн мыйзамга өзгөртүү киргизүү зарыл деп эсептейт.

— Мына, айтып жатасыздар, «буларга акыйкатты, көз каранды эместикти камсыз кылып бергиле» деп. Кол астыңарда мыйзам бар. Ошол мыйзамга анда “мамлекеттик органдар КТРКнын редакциялык ишине кийлигишүүсүнө таптакыр тыюу салынат. Ал эми мамлекеттен каржы кепилдик түрдө берилет” деген норманы киргизиш керек.

Эл өкүлү Рыскелди Момбеков Байкоочу кеңештин отчётуна каршы чыгып, сынга алды. Анын пикиринде, Байкоочу кеңеш өз максатына жеткен жок.

КТРКнын Байкоочу кеӊеши башкаларга үлгү боло алган жок. Бизге берген отчетуӊардын үчтөн бир бөлүгү өзүӊөрдүн өмүр баяныӊар, бир бөлүгү КТРКнын башкы директору башкы директору Илим Карыпбековдун иши экен. Калганы Шестаков түз эфирге чыкты, Айбек Карымов түз эфирге чыкты деген сөздөр. Ушул дагы отчётпу? Бир жылда 60 арыз түшүптүр, демек, элдин ишеними бар. Бирок алкышыӊардан каргышыӊар арбын тура. Байкоочу кеӊеш Карыпбековду көзөмөлдөбөй эле, Карыпкулов силерди көзөмөлдөп калыптыр. Ошондон улам, мен мурда Байкоочу кеӊешке берген добушумду кайтарып алып, отчетуӊарга каршы добуш беремин. Коомчулуктун бере турган баасы деле ушундай болуш керек.

Жыйынтыгында парламент жаштарды туура жолго салуу багытына каршы келген берүүлөрдү бербөө, кыргыз тилинин туура сүйлөнүшүнө, колдонулушуна көңүл буруу зарылдыгын белгиледи. Мындан сырткары, КТРКга бөлүнгөн каражатка Эсеп палатасы талдоо жүргүзүлүшү керектиги боюнча сунуш берилди.

Андан соң депутаттар тарабынан айтылган сунуш-пикирлерди камтуу менен Байкоочу кеңешинин отчетун эске алуу боюнча Жогорку Кеңештин токтому кабыл алынды.

Comments are closed.

Марал Радиосу cможет принять любую посещаемость благодаря кешированию WP Super Cache