Жер көчкү коркунучу бар аймактан он үй-бүлө көчүрүлүүдө

Жалал-Абад облусунун Аксы районуна караштуу Кара-Камыш айыл өкмөтүнүн Жүзүмжан айылында жер көчкү активдеше баштагандыгына байланыштуу, кооптуу аймакта жашаган 10 үй-бүлө убактылуу коопсуз жайга көчүрүлүүдө.

Бул тууралуу Өзгөчө кырдаалдар министрлигинен кабарлашты.

Үй-бүлөлөрдү коопсуз жайга көчүрүү үчүн райондук өзгөчө кырдаалдар бөлүмүнүн өздүк курамы тартылып, көчүрүү комиссиясы тарабынан автоунаалар бөлүнүп, коопсуз аймакка чыгарылууда.

Жалал-Абад облусунун аймагында 1020 кооптуу аймакта 1067 үй-бүлө жашайт. Жыл сайын жаз-жай мезгилдеринде жергиликтүү бийлик өкүлдөрүнө жана тургундарга коопсуз жайга көчүү боюнча эскертүү берилет.

6-майда Базар-Коргон районунун Арстанбап айыл аймагына караштуу Чкалов айылында жер көчкү түшүп, бир үй-бүлө көчүрүлгөн.

Жер көчкөн аймактын айланасында 250 метр узундукта 20-25 см жаракалар бар экени аныкталып,  жергиликтүү тургундарга эскертүү берилген.