Жапаров: Министрлер кабинети электрондук сооданы өнүктүрүүгө көңүл бурууда

Электрондук коммерциянын өнүгүшү менен почта кызматы жанданып, почтальон дагы бир жолу замандын каарманына айланууда. Мындай пикирин Министрлер кабинетинин төрагасы Акылбек Жапаров Ысык-Көл облусунун Чолпон-Ата шаарында өткөн электрондук коммерция боюнча экинчи эл аралык форумдун ачылышында айтты.

Иш-чарага электрондук соода тармагындагы алдыңкы эксперттер, ишкерлер, инвесторлор жана новаторлор чогулду.

Акылбек Жапаров видео байланыш аркылуу Министрлер кабинети электрондук соодага олуттуу көңүл буруп жатканын айтты.

«Insider Intelligence маалыматында, 2025-жылга чейин дүйнөлүк электрондук соода чекене сатуу 50% га өсүшү мүмкүн, ал 7,3 триллион долларга чейин, жалпы чекене сатуунун 24,5% түзөт. Бул 2021-жылы 4,9 триллион долларга салыштырмалуу жалпы чекене сатуунун 19,6% түзөт. Бул форум Кыргызстандагы электрондук коммерция компаниялары дуушар болгон акыркы тенденцияларды жана көйгөйлөрдү изилдөө жана талкуулоо үчүн уникалдуу мүмкүнчүлүк берет», — деди Акылбек Жапаров.

Ал ошондой эле өлкөдө санариптештирүү тездетилген темп менен жүрүп жатканын, жарандар керектүү документтерди кыска убакыттын ичинде алышарын кошумчалады.