Май айында казинодон бюджетке канча акча түштү? Финансы министрлигинин маалыматы

Быйыл май айында казино ишмердүүлүгүнөн мамлекеттик бюджетке 19,8 миллион сом түштү. Бул тууралуу Каржы министрлигинин маалыматтарында айтылат.

Жалпысынан жыл башынан бери (январь-май) бюджетке кумар оюндарынан 88,2 млн сом түшкөн.

Оюн автоматтарынын жана компьютердик симуляторлордун кумар оюндарына салыктан январь-май айларында бюджетке 675 миң сом түшкөн.

Ал эми букмекердик конторалардын кумар оюнунан жана лотереядан — 5 миллион сом.

Жалпысынан Кыргызстанда кумар оюндарынын бардык түрүнөн түшкөн пайда 93 миллион 967,1 миң сомго жеткен.

2023-жылдын сентябрынын аягында «Достук» мейманканасында «Кристалл» казиносу да иштеп жатканы белгилүү болгон.

2024-жылдын 13-мартында Golden King ЖЧКсына кумар оюндарын жүргүзүүгө лицензия берилген.

Жалпысынан 2023-жыл ичинде казинолордон бюджетке 91 миллион 547 миң сом түшкөн.

Буга чейин бийлик казинолор лицензия алгандан кийин иштей баштаган биринчи жылы 1 миллиард сомдон 2 миллиард сомго чейин киреше алып келерин айтып келишкен.