Экология министрлигинде 100 млн сомдон ашуун каржылык бузуу болгон

Жаратылыш ресурстары, экология жана техникалык көзөмөл министрлигинде жана ага караштуу мекемелерде 100 млн 988 миң 100 сомго каржылык мыйзам бузуу болгону аныкталды. Бул тууралуу Эсептөө палатасы билдирди.

27-январда Эсептөө палатасы министрликтердин 2022-жылдагы бюджетин аткаруулары боюнча аудиттин жыйынтыгы каралган. Анда министрликтердин дээрлик көпчүлүгүндө ири суммадагы каржылык мыйзам бузуулар болгону айтылган.

Анын жыйынтыгында айтылган министрликтен төмөнкүдөй каржылык бузуулар табылган:

• бюджеттик тутумдун каржысын аткаруудагы бузуулар жана кемчиликтер – 11 млн 290 миң 700 сом;
• мүлктү пайдалануудагы бузуулар жана кемчиликтер – 9 млн  459 миң 800 сом;
• эсепке алуу жана отчёт тартибин бузуу –77 млн 288 миң сом;
• «Мамлекеттик сатып алуулар жөнүндө» мыйзамды бузуулар – 2 млн 949 миң 600 сом.

Аудиттин корутундусуна ылайык, текшерилген министрликке отчёт, жазма буйрук, сунуштама жөнөтүлгөн.

Андан тышкары Финансы министрлигине жазма буйрук, Ички иштер министрлигине 2021-2022-жылдарга лицензияны кармап калуу үчүн жыйымдын төлөмдөрүн эсептөө маселеси боюнча материалдар жиберилген.