ФСБ «Вагнерге» каршы козголгон кылмыш ишин токтотту

Орусиянын федералдык коопсуздук кызматы (ФСБ) «Вагнер» жеке аскердик компаниясынын башчысы Евгений Пригожинге карата козголгон кылмыш иши токтотулганын жарыялады.

Мекеменин билдирүүсүндө коопсуздук кызматы «козголоңдун катышуучулары түздөн-түз кылмыш жасоого багытталган аракеттерди токтоткондугун аныктады» деп айтылат.

26-июнда Пригожинге каршы иш жабыла электигин Башкы прокуратурадагы булагына таянып, «РИА Новости» агенттиги жазган.

Пригожин аскердик төңкөрүш аракетинен кийин алгачкы жолу үн катты

24-июнь күнү эртең менен «вагнерчилер» Ростов-на-Донудагы аскердик объектилерди көзөмөгө алганы жарыяланып, Москвага бет алышкан. Орусиянын федералдык кызматы Евгений Пригожинге каршы кылмыш ишин козгогон.

24-июндун кечинде Беларусиянын президенти Александр Лукашенко Пригожин менен сүйлөшүү жүргүзүп, «вагнерчилердин» куралдуу кыймылын токтотууга келишишкен. Ошол эле кечте «Вагнердин» жалданма аскерлери Ростов-на-Дону шаарынан чыгып кете баштаган.

Буга чейин Кремлдин басма сөз катчысы Дмитрий Песков макулдашууга ылайык, Евгений Пригожинге каршы кылмыш иши токтотулуп, өзү Беларуска барарын билдирген.