Азыр да кеч эмес. Атамбаев Октябрь окуяларына байланыштуу бийликке кайрылды

Кыргызстандын мурдагы президенти Алмазбек Атамбаев 2020-жылдын октябрь окуяларына эки жыл өткөнүнө байланыштуу кайрылуу жасады. Анын кайрылуусун «Социал демократтар» партиясынын лидери Темирлан Султанбеков жарыялады.

Атамбаев 5-6-октябрда эл мамлекеттин тарыхында үчүнчү жолу үй-бүлөлүк-кландык башкарууга жол берген президентти кулатканын, бирок андан кийинки окуялар такыр башка нукка бурулганын белгилейт.

«15-октябрда президенттиктен расмий түрдө баш тартууга аргасыз болгону менен, ал чындыгында бийлик тизгинин Жапаров, Ташиев, Зулушевдерге макулдашып өткөрүп берип, элден өч алууга жетишти. Атайын кызматтар тарабынан жазылып, соцтармакка тараткан, уят сөздөрдү камтыган аудиотасмада муну Сооронбай Жээнбеков өзү да мойнуна алып жатат. Башкача айтканда, жеңиш элден жөн эле уурдалган» , — деп айтылат кайрылууда.

Атамбаев Кыргызстандын тарыхындагы эң ыплас парламенттик шайлоонун жыйынтыгын жокко чыгаруу үчүн Ала-Тоо аянтындагы карапайым эл резина окторунун, ууланган газдын жана кулак тундурган гранаталардын мөндүрүнө кантип туруштук бергени унутула элек экенин айтат.

Бийлик аларга каршы милицияны гана эмес, аскерлерди да жөнөтүп, желим окторду, ууланган газ снаряддарын жана жеңил үндүү гранаталарды колдонгонун белгилейт.

«Натыйжада аянтта 19 жаштагы Үмүт каза болду, жүздөгөн бала олуттуу жаракат алды, ондогону көздөрүнөн ажырап, көрбөй калды. Мына ушулардын аркасы менен Садыр Жапаров абактан чыгып, президент болуу мүмкүнчүлүгүнө ээ болгон. Бирок ал жабыркаган жаштарга кандай мамиле кылды? Сыйлыктарды тапшырып жана дарыланууга жардам берүүнүн ордуна, алардын көбүн баш аламандыкка катышканы үчүн деп милиция тарабынан суракка тартылды. Ал эми тескерисинче, азыркы бийлик бир эле Сооронбай Жээнбековду коргоп-колдоп, «ырымдаган» жок, анын бүтүндөй уурулар кланын, коррупционерлерди жаап-жашыргандарды, укук коргоо органдарында кылмыш иштерди ойлоп табып токугандарды коргоп-колдоп, «ырымдап» жатат».

Атамбаевдин пикиринде, Садыр Жапаров өзүн эмнегедир президенттик кызматы үчүн Жээнбеков, Зулушев, Ташиевдерге милдеткер сезет. Бирок ал өзү жеңишке жетип, президент боло алмак.

«Эки жыл өттү. Балким президент чындап эле элдин жашоо турмушун жакшырткысы келип жаткандыр. Бирок, башында калпка, бир ууч саясатчыларга көз карандылыкка негизделген саясат ийгиликке алып бара албайт. Ошондуктан Садыр Жапаровдун эң эле келечектүү көрүнгөн долбоорлору менен иш-аракеттери да чанда гана жакшы аяктайт. Бир калп аны менен калган кирдин баарын сүйрөп келет. Чек ара, кадрлар, экономика, коррупционерлер жана башка көйгөйлөр боюнча бүдөмүк, күмөндүү чечимдер ишенимсиздикти жана көптөгөн мыйзам ченемдүү суроолорду жаратты. Керек болсо бийлик бетине кармап мактаган Кумтөр боюнча да коомдо көп суроолор пайда болуп жатат«.

Атамбаев Садыр Жапаровго кайрылып, коомчулук үчүн түшүнүктүү, калыс чечимдерди, анын ичинде кадрдык чечимдерди кабыл алууга кеч эмес экенин айтты. Президент Жапаров дагы деле кырдаалды оңдой аларына ишенерин билдирди.

2020-жылы октябрдагы парламенттик шайлоонун жыйынтыгына нааразылык күчөп, массалык түрдө митингдер өткөн. Ал башаламандыкка айланып, бийлик алмашкан. Андан кийин Кыргызстанда Конституция өзгөртүлүп, президенттик башкаруу киргизилген.