Баткенде кыргыздар менен тажиктер мушташты (видео)

Бүгүн, 16-декабрда кыргыз-тажик чек арасында куралдуу жаңжал болгонун Чек ара кызматынан билдиришти.

Кыргызстандын жарандары Баткен районундагы Көчө-Бою тилкесинде курулуш иштерин жүргүзүшкөн. Окуя болгон жерге Тажикстандын УКМКсынын чек арачылары келип, курулушту токтотууну талап кылышкан.

Сүйлөшүү жаңжалга айланган. Чатак учурунда Тажикстандын атайын кызматынын кызматкерлеринин бири «Макаров» тапанчасынан асманга 4 жолу ок чыгарган.

Кыргызстандын Баткен облусу боюнча чек ара өкүлү менен Тажикстандын Исфара районунун чек ара өкүлдөрү жолугушкан.

Кыргызстандын жарандары чек ара тилкесине жакын эмес, Көчө-Бою айылынын ичинде курулуш иштерин жүргүзгөндүктөн, тажик тарап курал колдонуунун мыйзамсыз болгонун моюндашкан.

Тажикстандын чек ара өкүлү чыр-чатакка жол берген аскер кызматкерлерине чара көрүлөрүн билдирген.

Тараптар бир тараптуу иликтөө жүргүзүп, жыйынтыгын чыгаруу үчүн жолугушууну макулдашкан.

Учурда кыргыз-тажик чек ара тилкесинде абал туруктуу деп мүнөздөлүүдө.