Калк Маслихаты– түркмөн парламентинин 56 депутаттан турган жогорку палатасы, алардын сегизин президент жеке өзү дайындайт. Башында Бердымухамедовдун аты аталган эмес, анын парламенттин башчылыгына дайындалышы күтүүсүз болду. 63 жаштагы президент Гурбангулы Бердымухамедов өлкөнүн өкмөтүн да башкарат.
Түркмөнстанды 2006-жылдан бери жетектеп келе жаткан Бердымухамедов эки палаталуу парламенттин түзүлүшү «өлкөнүн мындан ары да демократиялашуусуна» багытталарын билдирүүдө.
Эксперттер Калк Маслихатын түзүү максатында Түркмөнстан Конституциясына киргизилген өзгөртүүлөр бийликти уулу Сердар Бердымухамедовго өткөрүп берүү үчүн жасалган айла деп эсептешет.
Быйыл февралда Гурбангулы Бердымухамедов 39 жаштагы уулу Сердарды өзүнүн орун басары жана Түркмөнстандын Жогорку көзөмөл палатасынын төрагасы кылып дайындаган. Ал — Мамлекеттик коопсуздук кеңешинин мүчөсү. Апрелде болсо ТИМ башчысынын ыйгарым укуктарынын бир бөлүгүн алды. Сердар Бердымухамедов «Түркмөн алабайы» ассоциациясынын жетекчиси да болуп эсептелет.
