«Кыргыз темир жолунун» директору Дашков кызматынан бошотулду

«Кыргыз темир жолу» мамлекеттик ишканасынын башкы директору Василий Дашков ээлеген кызматынан бошотулду. Бул тууралуу Транспорт министрлигинин маалымат кызматынан кабарлашты.

Маалыматка ылайык, Дашков премьер-министр Улукбек Мариповдун 26-марттагы буйругу менен иштен кеткен.

Буга чейин социалдык тармактарда «Кыргыз темир жолу» мамлекеттик ишканасынын башкы директору Василий Дашков отставкага кетерин жазып чыгышкан. Бирок ал жетектеген ишкананын маалымат кызматы 30-мартта бул билдирүүнү төгүндөгөн болчу.

Василий Дашковдун акыркы кызматтык визити 16-17-мартта Өзбекстандын Ташкент шаарына болгон. Анда ал «Узбекистон темир юллари» ачык акционердик коомунун төрагасы Хуснутдин Хасилов менен жолугушкан.

Василий Дашков «Кыргыз темир жолуна» өткөн жылдын 11-апрелинде ошол кездеги өкмөт башчы Мухаммедкалый Абылгазиевдин буйругу менен жетекчи болуп дайындалган.

Ага чейин мамлекеттик ишкананын жетекчисинин инвестиция тартуу жана курулуш маселелери боюнча орун басары болуп келген. Темир жолдо 2006-жылдан бери эмгектенип келет.

Кошумчалай кетсек, буга чейин иликтөөчү журналистер Али Токтакунов менен Болот Темиров аталган тармактагы тендерлерди Дашковдун өзүнүн компаниялары утуп келгендигин жарыялашкан.