Минскте интернет жана социалдык тармактар кайра иштей баштады

Беларусиянын борбор шаары Минскте мобилдик интернет жана социалдык тармактар иштей баштады. Бул тууралуу РИА Новости агенттиги жазды.

Жергиликтүү убакыт боюнча болжол менен саат 6:50дө бардык социалдык тармактар (Facebook, WhatsApp, Telegram жана башкалар) бир эле учурда иштей баштаган. Алар жекшемби күнү кечинде, 9-августта, республикада президенттик шайлоо өткөндөн кийин өчүрүлгөн болчу.

Беларусиядагы нааразычылык акциялары өлкөдө президенттик шайлоодон кийин башталган. БШКнын маалыматы боюнча, учурдагы мамлекет башчы Александр Лукашенко 80,08% добушка ээ болгон. Коопсуздук күчтөрү нааразычылык акциясына чыккандарга күч колдонуп, көздөн жаш агызуучу газ, суу жана гранаталарды ыргытышкан. Ошондой эле 5 миңге жакын адам кармалып, бир активист каза болгон. Оппозициячыл талапкер Светлана Тихановская президенттик шайлоодо жеңишке жетип, бирок бийликтин кысымы менен өлкөдөн чыгып кетүүгө аргасыз болгонун билдирген.