Соль-Илецк шаарында кармалып турган 541 кыргызстандык мекенине келди

Орусиянын Оренбург облусунун Соль-Илецк шаарында убактылуу кармалып турган 541 кыргызстандык жарандарды алып келишти. Бул тууралуу Тышкы иштер министрлиги билдирди. Алардын баары обсервацияга алынат.

— 541 жаран Казакстан тарап менен жетишилген макулдашуунун жыйынтыгында алынып келинди. Алар коронавирустун жайылышына байланыштуу Орусия менен Казакстандын чек арасында Казакстанда киргизилген өзгөчө абалдын аякташын күтүп калышкан, – деп айтылат маалыматта.

Кыргызстандын Тышкы иштер министрлиги, Казакстандын аймагында өзгөчө абал алына электигин жана чет өлкөлүктөрдүн Казакстанга киришине чектөө киргизилгенин эскертет. Мындан улам Соль-Илецк шаарынан жарандардын кайтарылышы, Орусиядагы жарандар үчүн орус-казак чек арасына келишине себеп болбошу керек экенин белгилеген.