Улуу Ата Мекендик согуштун ардагерлерине 75 миң сомдон сый акы берилет

Мамлекет Улуу Ата Мекендик согуштун ардагерлерине бир жолку жардам катары 75 миң сомдон сый акы төлөйт. Президент Сооронбай Жээнбеков буга байланышкан Жарлыкка бүгүн, 4-мартта кол койду. Бул тууралуу президенттин маалымат кызматы кабарлады.

«Улуу Ата Мекендик согуштагы фашизмди жеңүүнүн бүткүл дүйнөлүк тарыхый маанисин эске алып, кыргызстандык жоокерлердин улуу эрдигине терең урмат кылып, ардагерлерге алардын көрсөткөн эрдиги жана баатырдыгы үчүн ыраазычылык билдирип жана ошондой эле Жеңиштин 75 жылдыгынын урматына Кыргыз Республикасынын Президенти Сооронбай Жээнбеков Улуу Ата Мекендик согуштун ардагерлерине бир жолку төлөмдөр жөнүндө Жарлыкка кол койду», — деп айтылат билдирүүдө.

Мамлекет башчысы өз сөзүндө Улуу Ата Мекендик согуштагы Жеңиштин 75 жылдыгы Кыргызстанда бүткүл элдик майрам катары эң жогорку деңгээлде белгиленерин бир нече жолу билдирген.

2020-жылдын 4-мартына карата маалыматка ылайык, Кыргыз Республикасында Улуу Ата Мекендик согуштун 251 ардагери жашайт.

Алардын ичинен:

65 — Улуу Ата Мекендик согуштун майыптары;

153 — Улуу Ата Мекендик согуштун катышуучулары;

15 — Экинчи дүйнөлүк согуш мезгилинде фашисттер жана алардын союздаштары түзгөн концлагерлерде, геттолордо жана башка мажбурлап кармоо жайларында жашы жетелек кезинде туткун болгон адамдар;

18 — 1941-жылдын 8-сентябрынан тартып 1944-жылдын 27-январына чейин курчоодо калган Ленинград шаарындагы ишканаларда, мекемелерде жана уюмдарда иштеген жана «Ленинградды коргогондугу үчүн» медалы менен сыйланган, ошондой эле «Курчоодогу Ленинград тургуну» белгиси менен сыйланган адамдар.

Жогоруда айтылган ар бир ардагерге бир жолку төлөнүүчү акчалай жөлөкпул катары 75 миң сомдон бөлүнөт.

2010-жылдын 1-январынан тартып Улуу Ата Мекендик согуштун ардагерлерине жеңилдиктердин ордуна ай сайын акчалай компенсация берилип келет. Жеңилдиктердин ордуна берилген акчалай компенсациянын көлөмү айына 7000 (жети миң) сом.

Ошондой эле 2010-жылдын 1-январынан тартып, Улуу Ата Мекендик согуштун ардагерлерине Президенттин өмүр бою берилчү стипендиясы төлөнөт. Стипендиянын көлөмү айына 10 000 (он миң) сомду түзөт.

Улуу Ата Мекендик согуштун ардагерлери жеңилдиктердин ордуна акчалай компенсация жана Президенттин стипендиясынан сырткары ай сайын пенсия алышат.