Биз менен байланышыңыз

Мунай базасындагы өрттү өчүрүүгө катышкандар сыйланат

Кыска кабар | 11 мая 2019 | 122 | 0

Министр Нурболот Мирзахмедов өрт өчүрүүчүлөрдү сыйлоо боюнча тапшырма берди. Бул тууралуу аталган министрликтин маалымат кызматы билдирди.

Өлкөнүн Өзгөчө кырдаалдар министри Нурболот Мирзахмедов министрликтин тиешелүү жетекчилерине Жалал-Абад облусундагы мунай базадагы өрттү өчүрүүгө катышкан өрт өчүрүүчүлөрдү сыйлоо боюнча тапшырма берди.

«Жалал-Абад шаарындагы мунай базадан чыккан өрттү өчүрүүдө өрт өчүрүүчүлөр чыныгы эрдик көрсөтүштү. Жанында күйүүчү-майлоочу каражаттар сакталган бир топ ишканалардын объектилери, 2000ге жакын жергиликтүү тургундун өмүрү, материалдык баалуулуктарынын сакталышы дал ушул ӨКМдин кызматкерлеринин тайманбастыгы, тилсиз жоону четтетүүдөгү билгичтиги, кесипкөйлүгүнө байланыштуу болду. Жалал-Абаддагы өрттү өчүрүү жалпы коомчулуктун көңүл чордонунда болуп, бардыгыбыз тынчсыздануу менен өрт өчүрүүчүлөрдүн эрктүү аракеттерине күбө болдук десем жаңылышпайм», — деди министр Н. Мирзахмедов.

10 сааттан ашык алоолонгон жалынды өчүрүүгө көп сандагы өрт өчүрүү топтору тартылып, жалпы 5300 тонна көбүк (пенообразаватель) сарпталган.

Copyright © 2017 Maral FM