Япониянын Яизу шаарында Кыргызcтандын консулдугу ачылды

Күн мурун Япониянын Тюбу аймагынын Айти, Фукуи, Гифу, Ишикава, Нагано, Шизуока, Тояма, Яманаси, Ниигата префектураларын камтыган Яизу шаарында Кыргызстандын Ардактуу консулдугунун салтанаттуу ачылыш аземи болуп өттү. Бул тууралуу Тышкы иштер министрлигинен билдиришти.

Маалыматка ылайык, Ардактуу консулдукту Мичинори Йотсухаши жетектеди.

Иш-чаранын жүрүшүндө элчи Эркинбек Осоев кеңсенин ачылышы менен Мичинори Йотсухащини куттуктап, консулдук патентти тапшырды. Ал Ардактуу консулдуктун эки өлкө ортосундагы дипломатиялык байланыштарды чыңдоо, экономикалык, маданий-гуманитардык кызматташтыкты кеңейтүү, ошондой эле түп аймагында жашаган мекендештерге ар тараптуу колдоо көрсөтүү үчүн жасаган иштеринин өзгөчө маанисин белгиледи.

Өз кезегинде Ардактуу консул Мичинори Йотсухащи көрсөтүлгөн ишеним үчүн ыраазычылык билдирип, Кыргызстандын жарандарынын мыйзамдуу укуктарын жана кызыкчылыктарын камсыз кылуу үчүн бардык күч-аракетин жумшай тургандыгын жана Кыргызстан менен Япониянын ортосундагы экономикалык жана маданий-гуманитардык байланыштарды өнүктүрүүгө толук көмөк көрсөтөөрүн баса белгиледи.

Яизу шаарынын мэри Хиромичи Нагано адам ресурстары жана жалпысынан эки тараптуу мамилелер жаатында өз ара аракеттенүүнү өнүктүрүү үчүн тыгыз кызматташууга жана биргелешкен долбоорлорду ишке ашырууга даяр экендигин билдирди.