УКМК: Чүйдө диний-экстремисттик агымдын 16 мүчөсү кармалды

Чүй облусунун аймагында «Йакын-Инкар» диний агымынын активдүү мүчөлөрү жана жактоочулары кармалды. Бул тууралуу Улуттук коопсуздук мамлекеттик комитетинен кабарлашты.

Үстүбүздөгү жылдын 31-майында УКМК менен ИИМ биргеликте Чүй облусунда тыюу салынган «Йакын-Инкар» диний агымынын активдүү мүчөлөрү жана жактоочулары жашаган жеринде издөө иштерин жүргүзүп, алдын ала маалыматтар боюнча экстремисттик идеологияны үгүттөөчү көп сандагы басылмалар, электрондук маалымат каражаттары (компьютерлер, флешкалар жана башка) табылып, алынган.

Жыйынтыгында тыюу салынган кыймылдын 16 мүчөсү кармалып, алардын ичинен өзүн мусулмандардын «халифасы» деп эсептеген М.Б.М. Кылмыш-жаза кодексинин 331-беренесинин 2-бөлүгүнүн («Экстремисттик уюмду түзүү жана каржылоо») негизинде айыпталып, №1 тергөө камак жайына киргизилген. Калган жарандарга тиешелүү чаралар көрүлүүдө.