Кайра шайлоо: Жаныбек Абиров талапкер болууга арыз берди

Бүгүн, 28-июлда №26 Ленин бир мандаттуу шайлоо округу боюнча 10-сентябрында өтө турган Жогорку Кеңешинин депутатын кайра шайлоого экс-депутат Жаныбек Абиров өзүн-өзү талапкер катары көрсөттү. Бул тууралуу БШКнын расмий сайтына жарыяланды.

Ушуну менен аталган округдан талапкер болгондордун саны 10го жетти.

№26 Ленин бир мандаттуу шайлоо округу боюнча депутаттыкка талапкерлерди көрсөтүү 10-августта аяктайт.

Жогорку Кеңештин депутаттыгына 2021-жылы №26 Ленин бир мандаттуу шайлоо округу боюнча шайланган Жаныбек Абиров мушташтан кийин өз каалоосу менен мандатын тапшырган. Борбордук шайлоо комиссиясы 28-мартта Жаныбек Абировду депутаттык мандатынан ажыратып, 29-мартта президент Садыр Жапаров №26 Ленин округуна мөөнөтүнөн мурда шайлоо өткөрүү боюнча жарлык чыгарып, шайлоо күн 28-майга белгиленген.

Депутаттыкка 29 талапкер ат салышып, алардын ичинен Дамира Ниязалиева алдыга чыгып, 6 242 добуш алган. Бирок БШКга Дамира Ниязалиева добуштарды сатып алуу ыктымалдыгы тууралуу бир нече маалымат түшкөн.

Материалдар текшерүү жана юридикалык баа берүү үчүн ички иштер органдарына өткөрүлүп берилип, тергөөгө чейинки текшерүү башталган. Анын алкагында эки киши кармалган. Андан кийин дагы бир талапкер Улан Сариев да добуш сатып алууга шектелгенин УКМК билдирген. БШК анын да каттоосун жокко чыгарган.

Борбордук шайлоо комиссиясы 28-майдагы шайлоону өткөрүүгө жалпысынан 18,6 миллион сом жумшаган.

10-июлда БШК 10-сентябрда кайра шайлоо өткөрүү боюнча жарыялаган. Аны өткөрүүгө бюджеттен 13 млн 208 миң 800 сом чыгымдала тургандыгы да айтылган.

Коомчулукта Жаныбек Абировдун кайрадан талапкер катары шайлоого бара тургандыгы айтылып, кызуу талкууланып келген.

№26 Ленин бир мандаттуу шайлоо округу боюнча талапкерликке кѳрсѳтүү жѳнүндѳ ниетин билдирген талапкерлердин тизмеси