Грек-рим күрөшү боюнча Дүйнө чемпионатынын жеңүүчүлөрүн тосуп алышты

Сербиядагы грек-рим күрөшү боюнча Дүйнө чемпионатынын жеңүүчүлөрү жана катышуучулар Бишкекке учуп келди.

Кыргызстандын грек-рим күрөшү боюнча курама командасын жана машыктыруучуларды «Манас» эл аралык аэропортунан министрлер кабинетинин төрагасынын орун басары Эдил Байсалов, маданият, маалымат, спорт жана жаштар саясаты министри Азамат Жаманкулов, балбандардын туугандары жана күйөрмандары салтанаттуу тосуп алышты.

Эскерте кетсек, 13-сентябрда Сербияда грек-рим күрөшү боюнча мелдештер толук аяктаган. Күрөштүн бул түрүнөн Кыргызстандын куржунуна үч медаль топтолду. Чемпионаттын алгачкы күнүндө Акжол Махмудов (77 кг) алтын утса, экинчи күнүнө Амантур Исмаилов (67 кг) коло жеңди. Ал эми Жоламан Шаршенбеков (60 кг) үчүнчү күндө алтын байгени утту.

Ошондой эле дүйнө чемпионатында Кыргызстандын грек-рим күрөшү боюнча курамасы жалпы командалык көрсөткүчтө бешинчи орунга илинди.

Чемпионатка кыргыз балбандары төмөнкү курамда катышты:

1. Жоламан Шаршенбеков, 60кг;
2. Тынар Шаршенбеков, 63кг;
3. Амантур Исмаилов, 67кг;
4. Акжол Махмудов, 77кг;
5. Атабек Азисбеков, 87кг;
6. Бексултан Махмудов, 97 кг.

Улукбек Карачолоков — улук машыктыруучу;
Азат Эркимбаев — башкы машыктыруучу;
Мейрамбек Ахметов — машыктыруучу.