Садыр Жапаров: ЖККУ мамлекеттеринин иштерине үчүнчү тарап кийлигишүүдө

ЖККУга мүчө мамлекеттердин ички иштерине үчүнчү тараптардын кийлигишүү аракеттери болуп жатат. Мындай пикирин президент Садыр Жапаров Москвада өткөн ЖККУга мүчө мамлекет башчыларынын юбилейлик жыйынында билдирди.

«Коопсуздукка байланышкан коркунучтар жана аскердик-саясий тирешүү ЖККУнун жооптуу зонасынын бардык чек араларына жакындап калды. ЖККУга мүчө мамлекеттердин ички иштерине үчүнчү тараптардын кийлигишүү аракеттери болуп жатат. Ошентип, жылдын башында биз мүчө мамлекеттердин биринде күтүлбөгөн коопсуздук кризисин токтотууга туура келди. Биз ыкчам жана эффективдүү жооп кайтардык», — деди ал.

Президент Ошондой эле  Ооганстандын айрым провинцияларында алардын тышкы демөөрчүлөрүнүн Борбордук Азия боюнча кеңири пландары бар эл аралык террористтердин жана экстремисттердин болушуна байланыштуу ЖККУнун түштүк чек арасындагы кырдаал кооптуу бойдон калып жатканын белгилеп, бул багытта саясий-дипломатиялык жана аскердик-техникалык коопсуздук чараларынын бардык комплексин ишке ашыруу зарылдыгын белгиледи.

Мындан сырткары ал ооган элине гуманитардык жардам көрсөтүү маанилүү экендигин, алардын арасында кыргызстандыктар да бар экендигин белгилеп өттү.