Гүлчө-Корул-Ылай-Талаа жолундагы сел алып кеткен көпүрөнү оңдоо иштери уланууда

Алай районундагы Гүлчө-Корул-Ылай-Талаа автожолундагы сел алып кеткен көпүрөнү оңдоо иштери уланууда. Бул тууралуу Транспорт жана жолдор министрлигинин басма сөз кызматы билдирди.

Учурда көпүрөнү калыбына келтирүүгө 10 жумушчудан турган топ иштеп, 1 эксковатор, 3 жүк ташуучу унаа, 1 грейдер, 1 автокран жана башка техникалар тартылган. Учурда көпүрөнүн астын бекемдөө иштери бүткөрүлгөн соң, өтмөккө плиталар коюлуп жол калыбына келтирилет. Ошондой эле көпүрөнүн эки тарабына бекемдөөчү дамбалар курулат.

Белгилей кетсек, 3-май күнү катуу жааган жамгырдан улам сел кетип, Алай районундагы Гүлчө-Корул-Ылай-Талаа автожолундагы көпүрөгө кеткен жолдун 30 метрин сел алып кеткен.