Былтыр Кыргызстандын Венгрияга экспорту 300 миң долларды, импорту 7 млн долларды түзгөн

Былтыр Кыргызстан Венгрияга 300 миң долларга экспорт жасап, ошол эле учурда ал жактан 7 млн долларга продукция сатып алган. Бул тууралуу Эл аралык иштер, коргоо жана коопсуздук боюнча комитеттин отурумунда Экономика жана каржы министринин орун басары Султан Ахматов билдирди.

Жыйында эки өлкөнүн Кыргыз-венгер өнүктүрүү фондун түзүү жөнүндө мыйзам долбоорлору биринчи окууда каралып, талкуу учурунда депутат Бахадыр Сулайманов Ахматовдон Кыргызстан менен Венгриянын соода жүгүртүүсү тууралуу сурады.

«Биздин экспорт өтө аз – 300 миң доллар. Ал эми импорт – 7 млн доллар. 2019-жылы экспорт 70 миң, импорт 6,8 млн доллар болгон. 2018-жылы экспорт 150 миң долларды түзгөн», — деди ал.

Ахматовдун айтымында, фонд алгач 16 млн доллар менен түзүлүп, жыл аягына чейин дагы 34 млн доллар бөлүнөт. Фонддун Директорлор кеңешинин курамы 5 адамдан турат. Алардын үчөөсүн кыргыз тарап, экөөнү венгер тарап коет. Фонддун төрагасы Министрлер кабинетинин башчысы тарабынан дайындалат.

Талкуудан кийин тармактык комитет аталган мыйзам долбоорун колдоп берди.