Коронавирус: Дүйнөлүк кырдаал

Коронавируска чалдыккандардын саны Европанын бир катар өлкөлөрүндө кескин өстү. Германия Антверпенди «коркунучтуу аймак» деп атады. Польшанын бир нече райондорунда маска кийүү милдеттендирилди. Лос-Анжелесте суу жана электр жарыгын өчүрүп, түнкү иштерге каршы күрөшүү чечими кабыл алынды. Дүйнө жүзүндө коронавируска кабылгандардын саны 18  миллиондон ашты. Пандемия башталгандан бери 708 миңден көп бейтап каза тапты.

Европада жаңы учурлардын саны кескин көбөйдү. 

Коронавирусту жуктурган бейтаптардын саны Европанын бир катар өлкөлөрүндө, айрыкча Францияда, Испанияда жана Грецияда кескин көбөйүүдө. Эксперттер эс алуу сезону аталган аймактарда пандемиянын экинчи толкунун пайда кылышы мүмкүн деп кооптонушат.

Францияда бир күндө 1695 жаңы учур катталды. Бул — акыркы эки айдагы эң жогорку көрсөткүч. Пандемия башталгандан бери өлкөдө 228,5 миң адам илдет илештирген.

Франция Европада жоготуулардын саны боюнча Британия менен Италиядан кийин үчүнчү орунда.

Тулуза шаарында эл көп чогулган жерлерде, соода борборлор, көчө менен сейил бактарда  ​​беткап кийүү милдеттендирилди. Буга чейин ушундай эле чаралар Лилль сыяктуу бир нече ири шаарларда киргизилген жана Парижге сунушталган.

Июнь айында карантин чаралары жеңилдетилген Испанияда акыркы 24 сааттын ичинде 1772 адам коронавируска чалдыкты. Жалпы республика боюнча 305,7 миңден ашуун учур катталган.

Швейцария Испаниядан келген иммигранттарга эки жумалык милдеттүү карантин киргизди. Канар аралдарына жана Балеар аралдарына кайтып келген саякатчылар эрежеден чыгарылды. Ушундай иш-чаралар бир нече башка өлкөлөрдө да колдонулат.

Грецияда дагы жаңы учурлардын көбөйүшү байкалды. Бир күндө 124 жаңы учур катталды. Премьер-министр Кириакос Мицотакис өлкө элине кайрылуусунда кескин чараларды көрүшү керек экендигин айтты жана кайдыгер болбоого чакырды.

Германия Антверпенди «кооптуу аймак» деп атады

Германиянын Санитардык-эпидемиологиялык көзөмөл кызматы Бельгиянын Антверпен шаарын «коркунучтуу аймак» деп атады, ошондуктан ал жактан келгендер изоляциялоого аргасыз болушат.

Роберт Кох Институту Германиянын өзүндө акыркы үч айда эң жогорку күнүмдүк оорусу — 1045 бейтап болгонун маалымдады. 7-майдан бери биринчи жолу бул көрсөткүч миң учурдан ашты.

Эксперттер айрым аймактарда карантинди киргизүү мындай абалды токтото албайт деп кооптонушат.

Польшанын саламаттыкты сактоо министри Лукаш Шумовски беткап тагынуу кээ бир райондордо, анын ичинде түштүк менен чыгышта дагы милдеттүү түрдө болорун жарыялады.

Лос-Анжелес банкеттер менен күрөшүүдө

Лос-Анжелесте ири банкеттер менен күрөшүү ыкмасы иштелип чыккан. Анткени банкеттер көпчүлүк учурда вирустун очогуна айланганы айтылат.

Шаардын мэри Эрик Гарцетти өз администрациясына жума күндөн тарта банкет өткөрүлүп жаткан имараттарда электр жарыгын жана сууну өчүрүү укугун берди.

Буга чейин Дүйнөлүк саламаттык сактоо уюмунун Саламаттыкты сактоо боюнча шашылыш программасынын аткаруучу директору Майк Райан бардык өлкөлөрдөгү жаштар коронавирустун жайылышын басаңдатуу үчүн банкеттерге болгон мамилесин өзгөртүүсү керектигин айткан.

Райан жаштар жоопкерчилик алардын артында экендигин түшүнүшү керек экенин белгилеген.

ДСУнун башкы директору Тедрос Адханом Гебрейесус да жаштарды ойлонууга үндөп, алардын тандоосу бирөөнүн жашоосуна барабар болорун билдирди.