Биз менен байланышыңыз

Президент менен Чодуев өзгөчө абал учурундагы айыл чарба маселесин талкуулады

Кыска кабар | 30 Мар 2020 | 277 | 0

Президент Сооронбай Жээнбеков бүгүн, 30-мартта, Айыл чарба, тамак-аш өнөр жайы жана мелиорация министри Эркинбек Чодуевди кабыл алды. Бул тууралуу президенттин маалымат кызматы билдирди.

Жолугушууда өлкөдө, анын ичинде өзгөчө абал киргизилген аймактарда жазгы талаа жумуштарын өткөрүү жана азык-түлүк коопсуздугун камсыздоо боюнча азыркы кырдаал талкууланды.

Мамлекет башчысы коронавирус инфекциясынын жайылуусу жана анын макроэкономикалык кырдаалга таасири шартында азык-түлүк коопсуздугун камсыздоого жана айыл чарба товар өндүрүүчүлөрүн колдоого өзгөчө көңүл бөлүнүшү керектигин билдирди.

Азык-түлүк коопсуздугу өлкөнүн улуттук коопсуздугунун маанилүү бир бөлүгү болуп саналарын баса белгиледи.

Ошондой эле Сооронбай Жээнбеков өлкөнүн бардык аймактарында жазгы талаа жумуштарын өз маалында жана үзгүлтүксүз өткөрүүнү камсыз кылуу зарылдыгына токтолду. Өзгөчө абал киргизилген райондорго бөтөнчө көңүл бурулушу керектигин кошумчалады.

Президент Сооронбай Жээнбеков айыл чарба тармагында азыркы кырдаалга байланыштуу жаралып жаткан маселелерди чечиш үчүн ишке тартылган мамлекеттик органдар менен жергиликтүү бийликтин өз ара комплекстүү кызматташуусун күчөтүү зарылдыгын белгиледи.

Айыл чарба, тамак-аш өнөр жайы жана мелиорация министри Эркинбек Чодуев бүгүнкү күндө бир катар региондордо белгилүү бир товар түрлөрүнө суроо-талап жогору болуп жатканын маалымдады.

Коронавирус инфекциясынын өлкөнүн экономикалык кырдаалына болгон кесепеттерин азайтууга багытталган чараларды ишке ашыруу боюнча республикалык штаб менен өз ара кызматташып, калкты негизги товарлар менен жетиштүү өлчөмдө үзгүлтүксүз камсыздоо жана алардын бааларынын жогорулашына жол бербөө боюнча иштер жүргүзүлүп жаткандыгын белгиледи.

Ошону менен катар ал өзгөчө абал киргизилген Ноокат, Кара-Суу жана Сузак райондорунда Өкмөттүн ыйгарым укуктуу өкүлдөрү жана аталган райондордун акимдери менен биргеликте жазгы талаа жумуштарын талаптагыдай өткөрүүнү камсыз кылуу боюнча ыкчам чаралар көрүлүп жатканын, айыл чарба техникаларынын жүрүүсү жана жер семирткичтерди ташып жеткирүү маселелери чечилип жатканын айтты.

Copyright © 2017 Maral FM