Орусия Евробиримдик менен аба байланышты убактылуу чектейт

Орусия коронавируска байланыштуу 16-марттан тарта Европа союзу өлкөлөрү менен жүргүнчү аба байланышын убактылуу чектейт. Мындай чечим өлкөнүн коронавируска каршы күрөшүү боюнча ыкчам штабынын жыйынында кабыл алынганын РИА “Новости” жазды.

— Бул чечим элдин ден соолугуна кам көрүү, мамлекеттин коопсуздугун сактоо максатында кабыл алынган. 16-марттан Москва сааты боюнча 00:00 дөн тарта жүргүнчү аба байланышына чектөө киргизилет. Орусиянын аймагынан Европа өлкөлөрүнө, жана ал жактан Орусияга багытталган аба каттамдар убактылуу токтотулат, — деп айтылат ыкчам штабдын билдирүүсүндө.

Маалыматка ылайык, Москвадан Европа өлкөлөрүнүн борборлоруна жана кайра келүүчү туруктуу каттамдарды Орусия чектебейт. Мындан сырткары, орусиялыктарды мекенине жеткерүүчү чартердик каттамдарга да тоскоолдук жок.