Швецияда терроризм боюнча кыргыз жаранына күнөө тагылды

Швециянын прокуратурасы терроризм тууралуу иш боюнча Кыргызстан менен Өзбекстандык жарандарга күнөө такты. Бул тууралуу РИА Новости жазды.

Маалыматка ылайык, үч шектелүүчүгө террордук кылмыш ишине даярдыктарды жүргүзгөн деген айып коюлду. Кармалган 6 жаран өзгөчө оор кылмыштарга каржылык жактан жардам берүү, акча которуу боюнча айыпталууда.

Маалыматка караганда, кылмыш иштери Стокгольмдун аймагында жана Стремсунд шаарында жасалган. Шектүүлөр күнөөнү мойнуна алышкан жок.

Алты шектүүнүн 5өө камакта. Соттук угуулар 7-январда башталат. Буга чейин шведдик ЖМКлар ушул жылдын апрелинен окятбрга чейин полиция Өзбекстан жана Кыргызстандан келген 5 жаранды кармаганын жазып чыгышкан. Алардын бири Швециядагы 2017-жылы теракт уюштургандыгы үчүн өмүр бою эркинен ажыратылган Рахмат Акилов менен байланыш бар делүүдө.